一一媽咪的部落格

由於唔想太過趕，今次我連埋搭飛機，用兩星期去左三個城市，包括首都夏灣拿 Havana、雲尼斯山谷Vinales Valley 同埋 千里達 Trinidad。

Havana係大城市，賣點係老爺車同新舊交替建築; Vinales Valley係鄉村，睇山同雪茄田; Trinidad係超過500年的西班牙殖民風古城，列入聯合國教科文組織世界遺產名錄。

要講，實在太多嘢想講，算了，還是睇遊記同相啦!

2016年12月17日

今日，期待已久的古巴之旅終於起程了。早上同一一玩左陣，就去左搵爸爸同阿媽、同細妹飲茶。一路食，都是老豆最有興趣聽我講去邊。臨埋單時，老豆仲寫咗幾隻字俾我，叫我小心D。佢好少出到聲，應該是真擔心。不過，我叫佢地放心，因為我應該都算做足功課。

老公送我到巴士站，一上巴士，我就展開第一次單獨旅行了。感覺其實唔係幾踏實。

去到機場，早早check in。check in時地勤哥哥問我係唔係有張古巴旅遊咭，我拎出黎，佢睇咗好耐，我個心都離一離。真係好驚有問題，未上機先回家。好彩，無事。

閒逛一輪就上機。隔離位應該也是香港人，再隔離是一對外國夫婦加一個一歲多的小孩。隔離位真的年青，很會睡，大部份時間都可以熟睡，即使那小孩哭過不停。幸好我飽經訓練，也體諒父母的難處，哭聲是可以忍受。不過的確幾辛苦。在飛機上睡不著(真的老了)，看了幾套電影，有一套叫bad moms，雖然拍得唔係好好，不過內容我都好明白，有一句都幾有共鳴﹕being a good mom is impossible! 笑死我。係，做阿媽其實一d都唔易。

在機上，最有趣是看一位年長空姐的表現。加航我上網睇，原來服務差是中外聞名。不過機票平，我都沒有期望。但原來，真係幾差。話說我隔離個女仔瞓咗，空姐派餐時她才剛醒，對於空姐問食咩，未回應得到。個空姐即時伸手在佢面前上下揮動，配合埋一個非常不屑的表情，然後，最絕是當個女仔答佢，佢擰轉走左。結果，由另一空姐補派。而問題是，隔一段時間再派小食，另一個空姐直情skip咗個女仔，個女仔呆了。我都忍唔住叫另一個空少派返。加航，真的名不虛傳。而食物質素不要多想。

捱了15小時左右，終於到達多倫多機場。由於我飛夏灣拿是之後一天，相隔超過一天，行李要照取，跟在身邊。而我刻意申請的Priority Pass貴賓咭，原來也用不著。因為那邊的機場貴賓室只可以當天航班用，我只好待在機場。我不想先花費，於是吃了機上留下的餐包和餅乾，就看書上網。過了一會，我看到機場外好像下雪。我從未見過下雪的，當下非常興奮，即使穿不夠衣服，我也出了機場外十數秒，拍了張照片。很開心呢!